انا قلت قبل كده ان مصر بلد الجنون المطلق (وانا من البلد ديه انا من البلد ديه) مافيش قانون اقصد قانون الدولة بس تخيلوا كده لو قوانين الطبيعة اختفت هي كمان، يعني مش الدنيا كانت زمانها زي الفل؟، حد مدايقك تروح مستل السيف من الهوا وقاتله وبعدين تخبيه في الهوا تاني، وهو يروح طالعلة درع حديد فالسيف يعمل شرارة مع الدرع ومايحصلوش حاجة، تقوم انت طلعالك دبابة وتتكون حواليك وتروح نافخ امه.
او مثلا تبقي واقف كده في اشارة قافلة تروح طالع بالعربية وتكسر الاشارة بس بدل ماتجري بالعربية تطير بيها.
ولو نفسك في مج نسكافيه والانبوبة فاضية تروح فاتح بقك تطلع نار، ساعتها كانت فرص العمل زادت وبدل مالمطاعم تشتري بوتجزات تجيب ناس عادية يسووا الاكل ويوفروا الصيانة والتجديدات، اللي ناره تخلص يترفد ويجيبه واحد بداله، واللي خطيبته تسيبه وتاكل عليه الشبكة بدل مايرمي عليها مية نار ينفخ في وشها، والبوليس يستجوبوا يقولهم ايه باتنفس، بس كان هايبقي فيه صعوبة في انك تبوس منغير ماتتنفس، كانت كلمة "هوت" زمانها ليها معني حرفي -ححح-.
ويا لو انت حرامي وأول مالبوليس يكبس تروح مختفي، كنت هاتبقي عالمي بجد.
لو مافيش جاذبية تيجي تشرب شوربة تلاقي الشوربة دخلت مناخيرك وحرقتلك عينك، وكل ماتاكل الاكل برضو يفضل واقف في زورك، عشان تبلّع تروح واقف علي راسك، تيجي تحط جل علي شعرك يفضل فوق راسك بكام سنتي زي آلهة الاغريق، ولو عيل صغير اتجنن وقال ينط يروح ملزوق في السقف او يطلع يجيب تلج من السحاب ويرجع.
لو ضغت الهوا برة البيت غير اللي في البيت، تيجي تفتح الشباك تلاقي نفسك اتشفط.
لو الواحد في الضالمة بيطلعله كشاف من فوق راسه ويكمل طريقه عادي.
لو عندنا خاياشيم ونعمل مسابقة غطس كلوا يكسب فيها.
مش كانت الدنيا هاتبقي زي الفل؟